t Evengelie volgens Johannes 19
01Dou luit Pilatus Jezus giezeln.
02Soldoaten vlochten n kraans van stiekeltakken, drokten hom dij op kop en gooiden hom n roodsangen mantel om scholders.
03Ze laipen op hom tou en zeden: "Hoera, veur Jeudenkeunenk!" Aalweg sluigen ze hom in t gezicht.
04Pilatus kwam nog n moal noar boeten. Hai zegt tegen t volk: "Heur ais! Ik loat hom hier veur joe noar boeten brengen. Doar kin ie oet opmoaken dat ter volgens mie haildaal gain grond is veur n aanklacht."
05Jezus kwam noar boeten mit kraans van stiekeltakken op en roodsangen mantel om. "Kiek, doar heb je hom nou den, dij stumper," zegt Pilatus tegen heur.
06Dou opperpriesters en heur knechten hom zagen, bèlkten zai: "Aan kruuspoal mit hom! Aan kruuspoal mit hom!" Pilatus zegt: "Neem hom den zulm mor mit en sloag hom aan kruuspoal. Mor volgens mie het hai naargens schuld aan."
07"Wie hebben n wet," zeden Jeuden weerom, "en noar dij wet vot, mout e dood: hai zee dat e Zeun van God was."
08Dou Pilatus dat heurde kreeg e t eerst recht benaauwd.
09Hai ging t gerechtsgebaauw weer in en vragt Jezus: "Ie den, woar kom ie heer?" Mor Jezus zee niks weerom.
10 "Tegen mie proat je nait?" zegt Pilatus tegen hom. "Wait je den nait dat ik hier t veur t zeggen heb of je vrij kommen of kruzegd worden?"
11 "Ie zollen haildaal niks over mie te zeggen hebben as joe van bovenòf gain zeggenschop geven was," zee Jezus weerom. "Doarom het wèl mie aan joe oetleverd het, dikste schuld."
12 Van dat ogenblik òf aan perbaaierde Pilatus aalvot hom lopen te loaten. Mor Jeuden bèlkten: "As je hom lopen loaten, bin ie gain 'vrund van kaaizer'. Want elk dij zok veur keunenk oetgeft, is tégen kaaizer."
13 Dou Pilatus dat heurde, luit e Jezus noar boeten brengen; hai luit hom op zien rechterstoul zitten, op Stainenplaain, "Gabbata" op zien Hebreeuws.
14 t Was veurberaaidensdag veur t Pesach, t Jeudse Pascha, zowat om mirregstied. "Doar heb je hom den, dij keunenk van joe," zegt Pilatus tegen Jeuden.
15 Mor zai bèlkten: "Vot mit hom! Dood mit hom! Aan kruuspoal mit hom!" "Joen keunenk, mout k dij kruzegen?" vragt Pilatus. Opperpriesters zeden weerom: "Ainegste keunenk dij wie hebben is kaaizer!"
16 Dou leverde hai hom aan heur oet, dat ze zollen hom aan kruuspoal sloagen.
Dou nammen ze Jezus over.
17 Hai sleepte zulm dwaarsbaalk tou stad oet noar Schedelploats, "Golgota" op zien Hebreeuws.
18 Doar hiesden ze hom aan kruuspoal, geliek mit twij aandern, ain links en ain rechts van hom, mit Jezus in t midden.
19 Pilatus haar ook n bredje mit opschrift moaken loaten dat op t kruus vastmoakt wer. Doar ston op: "Jezus oet Nazaret, keunenk van Jeuden."
20 n Bult Jeuden leesden dat, stee doar Jezus kruzegd was lag ja stoef bie stad. t Ston der in Hebreeuws, Letien en Grieks.
21 Opperpriesters zeden tegen Pilatus: "Der mout nait stoan 'Keunenk van Jeuden', mor 'Hai het zegd: Ik bin keunenk van Jeuden.'"
22 "Der blift stoan wat ter staait," antwoordde Pilatus.
23 Dou soldoaten Jezus aan kruuspoal sloagen haren, pakten ze zien klaaieroazie en legden dij op vaaier bultjes, veur elke soldoat ain. Mor zien onderklaid was aan ain stok weven, van onder tot boven: der zat gain noad in.
24 "Loat wie dat nait in stokken scheuren en verdailen," zeden soldoaten tegen nkander. "Loat wie der om lötten wèl of dij krigt." Zo kwam oet wat in bekende zinsnee staait:
"Ze hebben mien klaaieroazie onder nkander verdaild
en om mien klaaier hebben ze dobbeld."
Dat hebben soldoaten doan.
25 Stoef bie Jezus zien kruuspoal stonden zien moeke en heur zuster, Maria, Klopas zien vraauw, en Maria oet Magdala.
26 Jezus zag zien moeke stoan en leerling dij hai zo geern lieden mog, bie heur. Den zegt e tegen zien moeke: "Dit is van nou òf aan joen zeun."
27 Tegen dij leerling zegt e: "Dat is van nou òf aan dien moeke." Van aigenste dag òf het dij leerling heur bie zok in hoes nomen.
28 Dou wos Jezus dat ales doan was. Den zegt e: 'k Heb dörst." Doarmit kwam oet wat of in bekende zinsnee staait.
29 Der ston doar n kroek mit wienazien. Doar muiken ze n spons flink nat mit, stoken dij op n hysoptak en huilen dij veur zien mond.
30 Dou e van dij wienazien pruifd haar, zee e: "Nou is ales doan!" Dou luit e kop zakken en bluis leste oam oet.
31 t Was dij dag ja veurberaaidensdag en Jeudse laaiders wollen nait dat liggoamen sabbat over aan t kruus hangen bleven, t was ook n hail biezundere sabbat. Doarom vruigen ze Pilatus heur bainen te breken en of noatied heur liggoamen vothoald worden moggen.
32 Dou kwammen soldoaten bainen breken van manlu dij tougelieks mit Jezus aan kruuspoal hongen wazzen, eerst van ain en dou van aander.
33 Mor dou ze bie Jezus kwammen, zagen ze dat hai al sturven was en doarom broken ze zien bainen nait.
34 Ain van soldoaten stook aal nog zien laans in Jezus zien zied. Op slag laip ter bloud en wotter oet.
35 Dij dit mit aigen ogen zain het, verkloart dit as getuge, en zien verkloaren is betraauwboar, mit bedoulen dat ook joen geleuf standholdt. Haizulm wait dat t apmoal woar is!
36 Dit is altmoal zo goan om woar te moaken wat ter in zinsnee staait:
"Van hom zel gain bonk broken worden."
37 Wieder staait ter in n aander zinsnee:
"Ze zellen nog ais zain in wèl as ze stoken hebben!"
38 Dou vruig Jozef, ain oet Arimatea, - mor den zo dat gainent t vernam, zo baang was e veur Jeudse laaiders - aan Pilatus of e t liggoam van Jezus vothoalen mog. Hai was n aanhanger van Jezus. Pilatus von t goud. Dou huil Jozef t liggoam vot.
39 Nikodemus, man dij Jezus in t verleden snaachts opzöcht haar, kwam ook mit. Hai haar n mengsel van mirre en aloë bie zok, sikkom honderd pond.
40 Ze nammen t liggoam van Jezus mit en wikkelden der linnen douken mit baalzems omtou, zo as Jeuden dat gewoon binnen as ze ain begroaven.
41 Stoef bie plek woar Jezus aan kruuspoal hongen was, lag n hof mit doarin n nij graf. Dat was nog nooit bruukt.
|